Pólska lánið: Rangfærslur í Morgunblaðinu í dag

Á blaðsíður 2 í Morgunblaðinu í dag segir:

LÁN Pólverja hljóðar upp á 630 milljónir pólskra slota, sem á núverandi gengi eru um 25 milljarðar íslenskra króna. Lánið er til 12 ára og ber 2% vexti út árið 2015, en 1,3% eftir það.

Þetta er ekki rétt, lánið ber ekki 2% og 1.3% vexti heldur er þetta vaxtaálagið sem bætist við vexti á pólsku ríkisskuldabréfunum sem við vorum látin kaupa fyrir þetta lán!  Enda segir á vef fjármálaráðuneytisins:

Greiðsluferlarnir samkvæmt lánssamningnum munu samsvara vaxtagreiðslu- og endurgreiðsluferlum hinna tilgreindu pólsku ríkiskuldabréfa. Hreinn kostnaður lántakanda mun þar af leiðandi eingöngu verða vaxtaálag sem greiða skal samtímis vaxtagreiðslum af pólsku ríkisskuldabréfunum. Vaxtaálagið verður 2% á ári fram til 31. desember 2015 en 1.3% á ári þar eftir.

Vextir og vaxtaálag er ekki það sama. 

Ef pólsku ríkisskuldabréfin bera 5% vextir eru við að borga 7% og 6.3% vexti af þessu láni.  

Hvers vegna erum við að taka þetta lán?  Þetta lán kemur aldrei til Íslands.  Við eigum að nafni til þessi pólsku ríkisskuldabréf en þau eru veðsett og líklega geymd í Varsjá og við borgum 500,000,000 kr. á ári fyrir geymsluna?  Þetta er svolítið eins og gömlu bankarnir voru að gera, lána fyrir hlutabréfum með veði í bréfunum sjálfum! 

Nú þegar fyrrum Seðlabankastjóri er sestur í ritstjórnarstól ættu að vera hæg heimatökin hjá Morgunblaðinu að útskýra fyrir lesendum hvernig þessi gjörningur mun styðja við krónuna og hvort þessi geymslukostnaður í Varsjá sé eðlilegur og góð fjárfesting fyrir skattgreiðendur?

Athugasemdir

[Benedikta E, 5.10.2009 kl. 15:47]

Andri - Þetta er ekki nógu gott.

Steingrímur veit ekkert hvað hann er að gera hann bara skrifar undir það sem honum er rétt.

Og þessir löngu útbrunnu fjármála "vitringar" sem hann hefur með sér eru ekkert betri........."

Þetta er ekki nógu gott....!

[Andri Geir Arinbjarnarson, 5.10.2009 kl. 16:14]

Benedikta,

Það er ekki undarlegt að Pólverjar hafi verið ágnægðir með þennan samning. Þetta er bara einföld pappírsmillifærsla í Varsjá.  Engin peningaútlán fyrir Pólverja bara að prenta nokkur ríkisskuldabréf með nafninu "Lýðveldið Ísland" og fá 500 m kr. á ári til 2015 og síðan 325 m kr í þóknun og geymslukostnað.  Tær snilld!

[Magnús Helgi Björgvinsson, 5.10.2009 kl. 16:39]

Kannski rétt að hlusta á t.d. Þorlvald Gylfason sem var að skýra þetta í gær. Við þurfum m.a. að eiga gjaldeyrisvarasjóð til að það verði ekki greiðslufall hjá ríkissjóði þegar við þurfum að greiða vextir og greiðslur af erlendum skuludm okkar. Og eins til að erlendir aðilar sem koma hingað þurfi ekki að óttast að sitja uppi með krónur sem þeir geti ekki skipt. Finnst þetta svo augljóst að fólk þurfi ekki að velta sér fyrir sér. Við getum lent í því hér suma mánuði að tugir milljarða þurfi að vera tiltækir til að greiða af skuldum Og nokkrir svona mánuðir mundu jú þurka upp gjaldeyrissjóði okkar við verstu aðstæður. Því er nauðsynlegt að erlendir aðilar viti af því að við höfum varasjóði sem við getum gripið til. Sem og þeir sem eiga hér ríkisskuldabréf og krónubréf.

Finnst náttúrulega brandari þegar menn halda því fram að örkerfi eins og við og krónan erum þurfum ekki að hafa trygga sjóði af gjaldeyrir.

[Bjarni Hákonarson (IP-tala skráð) 5.10.2009 kl. 16:41]

Getur einhver í veröldinni útskýrt hvað þetta "lán" og hvað á það að gera fyrir okkur? Virðist tekið með þeim skilyrðum að kaupa pólsk ríkisskuldabréf og vaxtaálag leggst á íslendinga.

Með hvaða hætti getur þetta stutt okkur? Við fyrstu sýn styður þetta Póland miklu frekar. Væri ekki miklu nær að við lánuðum Pólandi, þeir keyptu íslensk ríkisskuldabréf og borgðuðu okkur 500 kúlur á ári?

[Andri Geir Arinbjarnarson, 5.10.2009 kl. 16:57]

Bjarni,

Einmitt, það þarf að útskýra þetta fyrir fólki.  Ég get ekki séð að yfirveðsett pólsk ríkisskuldabréf (markaðsvirðið er lægra en nafnvirði strax við undirskrift)  styðji við eitt eða neitt hér á landi.  Það vantar eitthvað upp á svo þetta gangi upp.  Getur AGS útskýrt þetta því þetta er vís eftir þeirra "cut and paste" fyrirskrift?

[Bjarni Hákonarson (IP-tala skráð) 5.10.2009 kl. 17:15]

Takk Andri,

Það eina sem ég get lesið út úr þessu er að íslensk ríkisskuldabréf séu minna virði en þau pólsku. Þannig að svona skipti geti styrkt á einhvern máta áhættuna á lánum til íslendinga með því að dreifa þeim til Pólands.

Hvað má þá segja um "styrka innviði Íslands". Eiga pólverjar meiri auðlindir?

Ég skora á einhvern sem er kunnugur slíkum viðskiptum að skýra þetta út. Helst ekki hagfræðingi (undanfarna mánuði hafa þeir reynst eins vel að sér og "sjáendur" sem eru til í að koma okkur í samband við framliðna).

[Andri Geir Arinbjarnarson, 5.10.2009 kl. 17:31]

Bjarni,

Ég hefði skilið þetta betur ef Pólverkjar hefðu tekið íslensk ríkisskuldabréf sem veð og sett þessa peninga inn á reikning okkar hjá AGS.

Í bloggi frá í gær spyr ég hvort við höfum leyfi til að selja þessi bréf eða skipta á þeim og íslenskum ríkisbréfum og hvaða skilyrði fylgja því.  Það gæti hins vegar orðið ansi dýrt fyrir okkur því við yrðum að taka markaðsafföll á okkur og þá fáum við fullan vaxtaþunga af þessu láni.  Allt í allt erum við þá að tala um vaxtakostnað sem gæti verið tveggja stafa tala!

Því miður vantar ansi mikið upp á upplýsingar hér.

[Bjarni Hákonarson (IP-tala skráð) 5.10.2009 kl. 17:55]

Sæll Andri,

Beiningarmaðurinn í Istanbúl mun fara bónleiður til búðar. Svo mikið er víst. Ég hef ekki trú á að efnahagsviðburðir komi fallandi af skýjum. Viðburðir efnahagslífs gerast vegna þess að einhver vill að þeir gerist. Auðvitað þarf að réttlæta þá og þess vegna er búin til atburðarrás. Póllandsdílinn er örþrifaráð beiningarmannsins frá Íslandi.

Uppskriftin er og var ...gefum þeim lausan tauminn og skrúfum svo snögglega fyrir strauminn (samanber Seðlabanka USA sem ekki veitti Íslandi fyrirgreiðslu þegar norðurlönd fengu þær). Þess vegna er dropi betri en sopi deyjandi efnahag (manni).

Þeim mun meiri auðlindir sem þjóð hefur yfir að ráða þeim mun meiri ásókn verður í þær auðlindir og þeim mun stærri verða ásækjendur. Undanfarna áratugi höfum við séð „öflin“ sækja á Suður-Ameríku, Asíu og Afríku. Nú er komið að okkur. Hvað er svo flókið við það. Aðferðirnar þær sömu (vottar ekki fyrir sköpun þar) og við erum einfaldlega næst í röðinni!

 Við erum einfaldlega að verða vitni að ásælni og yfirtöku eigna og auðlinda þjóðarinnar.

[Bjarni Hákonarson (IP-tala skráð) 5.10.2009 kl. 17:58]

"dropi betri en engin sopi" átti þetta að vera

[Arinbjörn Kúld, 7.10.2009 kl. 11:12]

Þetta er algjör brandari og súrealískt. Allt í anda gömlu viðskiptaháttana sem settu hér allt á hausin. Líklega er þessi gjörningur til þess ætlaður að kaupa atkvæði Pólverja þegar kemur að atkvæðagreiðslu eða samþykki aðildarríkja ESB við inngöngu Íslands í sambandið.

Kveðja að norðan.