Icesave: Að semja við sjálfan sig!

Hér situr fjárlaganefnd með sveittan skallann og semur viðauka við sjálfan sig.  Vinnubrögðin við þennan samning eru með eindæmum.  Svavar samdi án þess að hafa Alþingi með og nú endursemur Alþingi samninginn án þess að tala við mótaðilann.  Hvar endar þessi vitleysa?

Þjóðin er skiljanlega á móti þessum samning en gerir sér ekki grein fyrir okkar veiku stöðu og heldur að við ráðum för og skipum Bretum og Hollendingu aftur að samningaborðinu.  

Í fyrsta lagi, við hverja eiga Bretar og Hollendingar að semja?  Hver er með samningsumboð Alþingis? Ef Íslendingar vilja endursemja hvað eru þeir tilbúnir að gefa á móti, styttri lánstíma og hærri vexti?  Það er eðlileg krafa ef hinn aðilinn teflir fram lélegri veðum.

Væri ekki nær að einhver hringdi til Hague og London og ræddi hvernig landið lægi hjá mótaðilanum og hversu tilkippilegir þeir væru til slaka örlítið á sínum kröfum?  Væri það ekki skynsamlegt í stað þess að vinna í einangrun og slengja fram einhverjum kröfum án þess að hafa hugmynd um hvort tekið verði í þær?

Ræða breytingar á Icesave í dag

Athugasemdir

[Hans Haraldsson (IP-tala skráð) 9.8.2009 kl. 15:54]

Höfuðborg Hollands er kölluð Haag á íslensku, Den Haag á Hollensku og The Hague á ensku.

Á engu máli heitir hún "Hague".

Annars hefur það margoft komið fram að "samþykkt" með fyrirvörum er í raun nýtt samningstilboð og það er ekkert eðlilegt við það að miða við venjulega lánsamaninga í þessu máli þar sem mikill vafi leikur á lögmæti kröfu Breta og Hollendinga en ákveðið hefur verið að leysa málið eftir pólitískum leiðum, sbr. Brusselviðmiðin.

[Andri Geir Arinbjarnarson, 9.8.2009 kl. 16:07]

Hans,

Þakka ábendinguna, "Den Haag" skal það vera eins og á móðurmálinu. 

[Hákon Jóhannesson (IP-tala skráð) 9.8.2009 kl. 16:22]

Fari þessi frágangur í eðlilegan farveg - undir hlutlausan dómsstól - fást svör við þeim spurningum sem þú leggur fram.  Þá verður það hluti af verkferlinu að svara þeim.

Kveðja.

[Finnur Bárðarson, 9.8.2009 kl. 16:24]

Við höldum að við séum að semja við okkur sjálf. Þannig eru nú vitsmunirnir.

[Andri Geir Arinbjarnarson, 9.8.2009 kl. 16:27]

En hvaða dómstóll og af hverju vorum við að semja ef við vildum dómstólaleiðina allan tímann?  Er þetta ekki svolítil tímasóun? Og ef við töpum málinu fyrir dómstól hvað þá, nei við viljum semja? Og svona koll af kolli.

[TH (IP-tala skráð) 9.8.2009 kl. 16:30]

Björgvin G., Össur o.fl. í Samfylkingunni eru félagar í breska verkamannaflokknum og Björgvin er sérstakur tengiliður flokkanna að eigin sögn. Ég geri ráð fyrir að þeir séu í beinu sambandi við Brown og taki við skipunum frá honum.

Þarna slær Samspillingin Sjálfstæða glæpaflokkinn algjörlega út í flærð.

Hljómar eins og fáránleg samsæriskenning en af þessu hafa þeir gortað undanfarin ár.

[Hákon Jóhannesson (IP-tala skráð) 9.8.2009 kl. 17:19]

Að sjálfsögðu hlýtur að vera lögsaga yfir þessa innláns viðskiptaferla sem voru varðaðir af regluverki EES.

 

Þetta er viðskiptakrafa sem þarf að fá meðhöndlun sem slík.

Er ekki hádramatísk milliríkjadeilda - en er orðin að einni slíkri í boði vanhæfra stjórnenda hér - Geirs H. Haarde og fleiri..

 

Annars er ég farinn að hallast að því að það séu einhverjar annarlegar ástæður fyrir því hve hræddir íslenskir valdhafar eru við dómsstólaleiðina. Þetta er hreint út sagt aumkunarvert.

 

Er nokkur möguleiki á því að  brotamennirnir yrðu kallaðir til raunverulegrar ábyrgðar og þá erlendis (en gætu ekki velt ábyrgðinni yfir á almenning hér) ?

 

[Andri Geir Arinbjarnarson, 9.8.2009 kl. 18:57]

Anne Sibert kastar góðu ljósi á hvers vegna allt klúðrast á Íslandi.  Hún gerir:

"...að umtalsefni þau vandamál sem fylgi því að í smáríkjum sé erfitt að fá nægilega fjölda hæfileikafólks til að gegna öllum embættum sem þörf er á í stjórnsýslunni. Þetta hafi sýnt sig í hruninu á Íslandi og aðdraganda þess. Tekur hún dæmi af Davíð Oddssyni forsætisráðherra í því sambandi sem hún telur að hafi ekki haft nægilega menntun og þekkingu á fjármálalífinu til að gegna embætti seðlabankastjóra. Þá segir hún að hvorki forsætisráðherra Íslands, fjármálaráðherra né Fjármálaeftirlitið hafi ráðið við það verkefni að hafa hemil á stækkun fjármálakerfisins. Þar sýni sig að of fáir menn hafi haft of stór verkefni til að ráða við þau. "