Seðlabankinn skiptir um skoðun

Loksins viðurkennir Seðlabankinn að krónan eigi eftir að verða lág næstu árin ef ekki áratuginn.  Þetta er mikil viðsnúningur frá því í júlí er Seðlabankinn var bjartsýnn á styrkingu krónunnar.

Það er búið að vera nokkuð ljóst lengi að krónan yrði lág til frambúðar og ekki er ég enn sannfærður um að botninum sé náð.  13. maí skrifaði ég pistil um krónuna og spáði að hún myndi toppa í 185 kr. evran ef við yrðum heppin, sbr.

Svo virðist sem Seðlabankinn sé að leiða innlenda markaðinn með krónuna í smáum skrefum nær hinum erlenda.  Vonin er að þeir mætist á miðri leið.  Þá toppar evran vonandi í 185 kr. ef við erum heppin.  Ef ekki, þá er margt sem bendir til að við fáum skeið með evru yfir 200 kr.  Vonandi að það standi ekki lengi yfir.  Því fyrr sem Icesave og fjármögnun ríkishallans kemst á hrein því fyrr kemst ró yfir krónuna.  andrigeir.blog.is 13.05.09

Málið er að Icesave er enn ófrágengið og ríkisfjármálin eru varla á föstu landi enn.  Því er mikil hætta á að krónan eigi eftir að gefa eftir 2010. Hingað til höfum við verið heppin en ef ekki spilast vel úr málum á næstu mánuðum eigum við eftir að sjá evruna í kringum 200 kr. á fyrri hluta 2010. 

Veiking krónunnar á sama tíma og skattahækkanir fara að bíta er ekki góð uppskrift fyrir verðbólgustöðuleika.  Óvissan heldur áfram.

 

Athugasemdir

[Sigurður Þórðarson, 10.12.2009 kl. 21:59]

Manni finnst það kannski ekki undarlegt með allar þessar vaxtagreiðslur ásamt 600 milljörðum í Jöklabréfum að krónan sé veik.

Háir stýrivextir eru sagðir styrkja krónuna (halda menn að útlendingar hlaupi til og ávaxti sitt pund í krónum?) en húsmóðir í Vesturbænum sagði mér að þeir myndu þýða hærra útstreymi fjár í formi vaxta. 

[HF (IP-tala skráð) 11.12.2009 kl. 08:24]

Góðir punktar! Nema hvað ég er farinn að vona að icesave verði ekki samþykkt. Þá yrðu okkur settir afarkostir sem ég held að yrði skárra en að hjakka í þessum hjólförum sem við eru í. Vonandi yrði þá einnig gerð krafa um að erlendir sérfræðingar greindu mál hér og mokuðu flórinn.