Bíll og hús flokkuð í fyrsta og annan flokk

Ekki verður betur séð en nýjar reglur um leiðréttingu á greiðslubyrði og aðlögun skulda munu leiða til tvöfalds markaðar með bíla og húseignir í framtíðinni.

Þeir sem eru svo lánsamir að þurfa ekki að fara í leiðréttingarferli geta áfram selt sínar eignir án vandkvæða svo framalega sem kaupandi er til staðar sem er tilbúinn að borga sanngjarnt verð.

En hvað með þennan nýja hóp sem fær leiðréttingu og borgar af lánum eftir greiðslugetu?  Hvernig selur þessi hópur sínar eignir og á hvaða verði?  Á nýr kaupandi að taka yfir gömlu lánin?  Er hægt að gera lánin upp við sölu, ef svo, hvernig og á hvaða verði?  

Segjum svo að fasteignakaupandi (sama á við kaupendur af notuðum bílum) hafi fundið tvær samskonar 4ja herbergja íbúðir sem hann hefur áhuga að gera tilboð í.   Önnur er með gamalt lífeyrissjóðslán en hin er með myntkörfulán í greiðsluaðlögun.  Við hvað mun verðtilboðið miðast í seinna tilfellinu? Greiðslugetu kaupanda eða seljanda? Og hvað ef kaupandinn á aðrar eignir?

Ansi er ég hræddur um að þeir fjársterkustu og þeir sem hafa bestu greiðslugetuna muni sniðganga eignir sem eru í greiðsluaðlögun og þar með skapa tvöfaldan markað. 

Eignir sem eru fyrir utan greiðsluaðlögun verða líklega mun auðseljanlegri og seljast á hærra verði en hinar.  Það er nefnilega alltaf hætta á að þessum lögum verði breytt svo kaupendur geta varla treyst því að þeir verði ekki krafðir fullrar greiðslu á upphaflegum höfuðstól lánsins. Óvissa um afskriftir mun því skapa tvöfaldan markað.

Auðvita munu þessar reglur hjálpa fólki í greiðsluerfiðleikum núna en þær geta líka sett þetta sama fólk í eins konar stofufangelsi og gert eignarmarkaðinn hér á landi mjög stirðan og óþjálan.

Athugasemdir

[mamman (IP-tala skráð) 30.9.2009 kl. 22:05]

En hvað ef lánið er orðið hæra en verðmat íbúðarinnar eins og raunin er hjá mörgum? Það á ekkert að höggva í höfuðstólinn. Hvernig fer þetta fólk að því að selja?

[Andri Geir Arinbjarnarson, 30.9.2009 kl. 23:01]

Mamman,

Það verður erfitt.  Þessar aðgerðir hjálpa þeim sem vilja (eða verða) að eiga sínar eignir þar til skuldir eru borgaðar að fullu.