Rífandi uppgangur erlendis meðan allt er stopp hér.

Hlutabréfamarkaðir erlendis eru í rífandi uppgangi þar sem menn telja að löndin í kringum okkur séu að komast út úr kreppunni.  Húsnæðisverð er farið að hækka í Bandaríkjunum eftir 2ja ára fall.

Ef ekki kemur bakslag mun atvinnuástandið fara að taka við sér þar sem lágir vextir og góður aðgangur að fjármagni er farið að segja til sín í aukinni eftirspurn og mörg fyrirtæki eru farin að undirbúa sig undir að ráða fleira fólk.

Því miður er ástandið hér allt annað.  Við búum við óborganlegar skuldir, háa vexti, höft og lokaða fjármagnsmarkaði.  Það mun taka miklu lengri tíma fyrir Ísland að komast úr þessari kreppu en aðrar þjóðir.  Það eru ekki góðar fréttir fyrir landflótta.

2010 þegar nýir skattar og niðurskurður bætist ofan á allt annað hér á landi verður freistandi fyrir yngri kynslóðina að flýja land  til okkar nágrannalanda þar sem spennandi tækifæri bíða.

 

Hlutabréf snarhækka

Athugasemdir

[Björn Kristinsson (IP-tala skráð) 21.8.2009 kl. 19:07]

Einhvern veginn tekst Norðmönnum (NOK) og Svíum (SEK) að klóra sig út úr þessu án þess að vera með EUR. Í báðum tilvikum er um litlar myntir að ræða á heimsmarkaði. Sérstaklega er NOK háð hagsveiflum á hrávörumörkuðum sem er í reynd eðli IKR þar sem hagkerfi Íslands er algjörlega háð útflutningstekjum líkt og Noregur.

Getum við þá sagt að NOK sé handónýt mynt ? Það fer eftir því hvernig peningastjórnun landsins er í heild sinni; menn geta dæmt um hvernig þeim hefur tekist til.

Jón Frímann, ástæða þess að við erum í svo erfiðum málum er aðeins að litlu IKR að kenna.

Helsta ástæðan er slugsaháttur í opinberri fjársýslu og óagaðri peningastjórnun ásamt skorts á eftirliti á fjármálamörkuðum.

Þetta er raun staðan en ekki hvað gjaldmiðillinn heitir.

Að horfa einhlýtt á EUR er einnig frekar þröngt sjónarhorn. Er þá USD handónýtur gjaldmiðill þar sem EURUSD hefur hækkað svo mikið síðustu mánaða ?

Varla enda mun EUR falla gegn USD þegar uppgangur hefst að nýju í BNA eða ef nýtt áfall kemur í hagkerfi heimsins.

[Björn Kristinsson (IP-tala skráð) 21.8.2009 kl. 20:09]

Saga ÍKR er "...hörmungarsaga" vegna þess hve stjórn peningamála hefur verið hér bæði hjá hinu opinbera sem og Seðlabanka. Það hefur ekkert með myntina að gera. Þetta er grundvallaratriði í myntfræðum þ.e. menn stilla af hagkerfi sitt í samræmi við myntina.

Þegar fjármálakerfið hefur verið blásið í um 15.000 milljarða IKR með mynt sem er ætluð fyrir ca 1400 milljarða þarf ekki að spyrja hvernig fer.

Er þá skaðinn IKR að kenna ? Nei auðvita ekki. Það er þeim sem stjórna.

Óskhyggja varðandi EUR. Ég vona EB vegna að EUR verði ekki eins sterk og hún er  næstu árin því þá verður lítill útflutningur frá EB löndum ergo mikið atvinnuleysi.

[Andri Geir Arinbjarnarson, 21.8.2009 kl. 20:20]

Seðlabankinn hér varð gjaldþrota ekki gleyma því.  Við eigum engan gjaldeyrisvaraforða sem er grundvöllur fyrir stöðuga sjálfstæða mynt.  Þess vegna urðum við að leita hjálpar hjá AGS.  Það er vart hægt að hugsa sér verra ástand fyrir sjálfstæðan gjaldmiðil en hér á Íslandi.  Það mun taka áratugi að byggja upp gjaldeyrisvarasjóð sem mark er takandi á.  Af hverju haldið þið að Asíuríki sem lentu í klóm AGS um 1990 hafi síðustu 15 árin einbeitt sér að byggja upp eins stóra gjaldeyrisvarasjóði eins og þeir geta?  Til þess að þurfa aldrei að leita á náðir AGS aftur. 

[óli (IP-tala skráð) 23.8.2009 kl. 14:23]

Þetta er ekki búið erlendis því miður. Okt-Nóv þá kemur annar skellur. Sannið bara til.