Skuldarar ráða ekki ferð

Að halda að Bretar og Hollendingar samþykki þessa fyrirvara möglunarlaust er óskhyggja.  Ef lánþegar eiga að ráða hvernig og hvenær þeir borga tilbaka verða ekki margir sem lána peninga.

Það er nær óhugsandi að Bretar og Hollendingar geti sætts á þessa fyrirvara án þess að koma fram með sínar athugasemdir og viðbætur.  Annars settu þeir fordæmi til annarra skuldsettra ríkja að nú væri færi á að sleppa billega frá óþægilegu skuldafeni.  

Íslendingar hafa nú sagt að þeir ráði ekki við aðrar skuldbindingar en Icesave næstu 15 árin.  Hver á að fjármagna endurreisn íslensk athafnalífs á þeim tíma?  Hver verður staða landsmanna næstu 15 árin ef við gerum ekkert annað en að borga niður skuldir?  Hvað mun það kosta mikið atvinnuleysi og landflótta?

Þessir fyrirvarar eru í raun uppgjöf og viðurkenning að við séum þegar gjaldþrota og ráðum ekki við ástandið eins og það er.  Kannski var það óumflýjanlegt, en samt held ég að það hefði verið æskilegra að reyna að borga og berjast áfram en að gefast svona strax upp.  

Stórskaðar hagsmuni Íslands

Athugasemdir

[Bjarni Einarsson (Garrinn) (IP-tala skráð) 17.8.2009 kl. 21:54]

"Ef lánþegar eiga að ráða hvernig og hvenær þeir borga tilbaka verða ekki margir sem lána peninga."

Málið er að við Ísland fengum ekkert þessa peninga að láni. Ísland er í EES og EES leyfir einkafyrirtækjum að stofna fjármálafyrirtæki og reka hvar sem er innan landa EES.

Eina skylda sem lögð er á heima ríki viðkomandi fyrirtækis, er að til sé tryggingasjóður. Og það gerðum við.

Hér varð hins vegar hrikalegt hrun. Hrun með þeim afleiðingum að þessi sjóður dugði ekki eitt né neitt, því fór sem fór.  

Bretar, Hollendingar og sérstaklega, ESB ber í það minnsta jafn mikla ábyrgð á því hversu laus í reipunum frjáls fjármálastarfsemi er, hið svokallað fjórfrelsi sem var innleitt með EES samningnum.

["Ábyrgðarmaðurinn" (IP-tala skráð) 17.8.2009 kl. 22:45]

Bjarni:  Ekki reyna að dreifa athyglinni frá gerendunum, eigendum og stjórnendum bankanna - þeim sem eru ábyrgir fyrir þessu rugli í dag.

Það var þeirra skylda og hluti af viðskiptaferlunum að gera sér fyllilega grein fyrir þeirri ábyrgð sem starfseminni fylgdi. Þeir kusu meðvitað þegar allt var komið á hausinn hjá þeim að taka með skuldsetningunni ólöglega "veð" í eigum almennings.  Umræddur tryggingarsjóður var ekki stór fyrir þessa snillinga, sem í raun voru smámenni.

Ábyrgðinni verður ekki varpað yfir á erlenda eftirlitsmenn.

Hvar eru svo gerendurnir í dag ? Eins og hæddir rakkar úti í bæ og bera allt af sér.  Þetta er einfaldlega aumkunarvert.  Skömm þessara manna er mikil.

[Bjarni Einarsson (Garrinn) (IP-tala skráð) 17.8.2009 kl. 23:30]

Ábyrgðarmaður.. ég er einmitt ekki að því.

Það eru ekki gerendurnir sem eiga að borga IceSave skuldirnar, það er verið að reyna að klína þeim á Íslensku þjóðina.

EES er samningur sem opnar landamærinn. Sama hvort þú ert Dani, Skoti eða Íslendingur, allir geta þeir stundað viðskipti grundvölluð á fjórfrelsinu, það er, frelsi til viðskipta á vörum, þjónustu og vinnu og síðan frjálsra fjármagnsflutninga. 

Það er ekki til stafur í þessum samningi sem leitar að gerendum og öllum þeim peningum sem þeir hafa stungið undan.

Samningurinn er allur miðaður við það að koma skuldinni yfir á Íslensku þjóðina. 

[Loftur Altice Þorsteinsson, 18.8.2009 kl. 00:12]

Þú kemst ekki að skynsamlegri niðurstöðu Andri, ef þú gefur þér niðurstöðuna fyrirfram. Þetta ættir þú að vita sem verkfræðingur. Þú vilt endilega láta þjóðina bera skulda-klafa, til að þú sjálfur getir átt náðuga daga. Þetta er ekki stórmannlegt.

Ég reikna með að Bretar og Hollendingar muni samþykkja þessa eftirvara, þar sem þeir hafa stjórnað samningu þeirra. Þetta hefur erki-sossinn Össur Skarphéðinsson upplýst.

Auðvelt er fyrir Breta og Hollendinga að sýna fram á að Icesave er af allt öðrum toga en venjulegar skuldir. Aðrir skuldunautar hafa fengið peninga að láni. Við höfum ekki fengið neitt fjármagn að láni og megum ekki að greiða Icesave-reikninga vegna aðildar okkar að Evrópska efnahagssvæðinu.

Það eru hrein öfugmæli hjá þér, að það sé uppgjöf að standa á rétti sínum. Svona bull er ekki mönnum bjóðandi. Auðvitað verðum við að standa við okkar samninga um EES, sem meðal annars fela það í sér að við megum ekki greiða Icesave.

Andri, þú segir sjálfur:

Hver verður staða landsmanna næstu 15 árin ef við gerum ekkert annað en að borga niður skuldir? Hvað mun það kosta mikið atvinnuleysi og landflótta?

Einmitt, við megum ekki leggja þessar skuldir á þjóðina sem þá gerir ekki annað en borga niður skuldir, ef það er þá mögulegt. Hvar er rökhugsun þín Andri Geir ?

[Andri Geir Arinbjarnarson, 18.8.2009 kl. 07:50]

Þessir fyrirvarar eru einfaldlega gjaldþrotayfirlýsing.  Líklegt er að samþykki á Icesave hefði leitt til gjaldþrots en það hefði ekki gerst fyrr en seinna.  Hér er kannski aðeins um tímaspursmál að ræða en það vitum við þó ekki þar sem við reyndum ekki að standa við okkar orð. 

Það voru óábyrgir og vanhæfir bankamenn með sofandi eftirlitsstofnunum sem komu þjóðinni á þennan skulda klafa.  Að halda að við losnum við að borga og getum afsýrt gjaldþroti með því að neyta að borga er ekki raunhæft.  

Eftir Icesave klúðrið munu koma lögsóknir erlendra kröfuhafa.  Við erum í engri stöðu til að segja lánadrottnum fyrir verkum.

[Margrét Sigurðardóttir, 18.8.2009 kl. 07:52]

Mér finnst of fljótt gefist upp við það að leggja áherslu á að sækja peninga til bankaræningjanna. Af hverju í ósköpunum er það ekki forgangsatriði?

[Andri Geir Arinbjarnarson, 18.8.2009 kl. 08:02]

Margrét,

Hárrétt og það átti að gerast í október 2008!  Hvað kom í veg fyrir það?  Pólitísk spilling?  Hver veit?

[ElleE (IP-tala skráð) 18.8.2009 kl. 11:31]

Andri, ætla bara að ítreka það að Icesave er EKKI okkar skuld.   Og get ekki skilið hví þú heldur því enn til streitu að við alþýða eigum að borga einka-skuldir auðróna.   Og í síðu Jóns V. Jenssonar lýstir þú því að við ættum að skrifa undir óbreyttan og stórhættulegan Icesave-samning.   Það finnst mér óskiljanleg röksemdafærsla af svo vel gefnum manni og ýmsum öðrum.   Andri það væri bara kúgun og við munum aldrei geta sætt okkur við að vera kúguð og þvinguð inn í himinháa skuld sem er ekki okkar.   AGS, Bretar, Hollendingar og EU vilja þvinga ísl. þjóðina inn í himinháa "skuld" sem við hvorki skuldum í alvöru né lagalega.   Fjöldi fólks upplifir það þannig að við værum að játa á okkur sekt og gætum ekki lagst lægra.   Fólk vill eðlilega ekki vera þrælar ofríkja.   Og ég tek undir það með þeim.  

Andri, þú hefur oft talað um að við séum að einangrast og kannski er það satt.  Hins vegar getum við ekki gleymt að það er heill stór heimur fyrir utan EU, 92% af honum.    Við getum ekki og megum ekki játast undir stórhættulega kúgun eins og Icesave.   Hann er ekkert skárri og kannski verri en Versalasamningurinn.   

[ElleE (IP-tala skráð) 18.8.2009 kl. 11:40]

Gleymdi einu:  Það er undarlegt að ekkert af Icesave skuldinni hafi enn verið sótt til London-búans Bjögólfs Thors (og co.).   Það þarf að þvinga peningana af honum/þeim fyrir skuldinni.   Fyrst núna fyrir nokkrum dögum var Alþingi að koma með tillögu um hert skattalög sem gætu hjálpað við að sækja mennina, sem eru sekir um að skulda Icesave, og aðra skuldara.   Það er nú e-ð bogið við töfina.   Tæpu ári eftir fall bankanna!?    Og hvað ætli sé undirliggjandi?   Hví eru þeir að draga það endalaust að sækja þessa menn sem hafa  ryksugað peningum út úr bönkunum?  Og meðal þeirra eru ríkustu menn Bretlands og heims.

[Loftur Altice Þorsteinsson, 18.8.2009 kl. 12:28]

Þeir sem halda því fram, að höfnun Icesave-samningsins muni leiða til meiri efnahagslegrar einangrunar landsins en annars mun verða, ættu að leggja fram rökstuðning fyrir fullyrðingum sínum.

Ég vil fá að sjá framan í þá "vini okkar og bandamenn" sem ætla að beita okkur kúgunum. Ég tek því fjarri, að beygja mig fyrir óljósum hótunum.

Að því getur komið að efnahagslegar þvinganir, eða vopnað ofveldi neyði okkur til ólöglegrar eða ósiðlegrar undirgefni, en að því er ekki enn komið. Reynum að standa sem lengst beinir í baki, sem frjálsir menn og fullvalda þjóð.

[Andri Geir Arinbjarnarson, 18.8.2009 kl. 21:02]

Elle,

Auðvita stofnaði íslenskur almenningur ekki til Icesave heldur vanhæfir og gráðugir íslenskir bankamenn.  Hins vegar voru íslensku bankarnir undir eftirliti FME og störfuðu með þeirra leyfi og vitund.  Það er ekki hægt að horfa fram hjá því.  Við erum aðilar að EES með tyggingarsjóð og þar höfum við gengist undir ákveðnar skuldbindingar.  Það sem gerir þetta Icesave svo erfitt og hræðilegt  eru neyðarlögin sem Geir Haarde sett þar sem innistæðieigendum er mismunað eftir útibúum bankanna.  Þar með hefst atburðarás sem við höfum ekki stjórn á.  Ríkisstjórn Geirs gekkst að Icesave skuldbindingum sem stjórn Jóhönnu tekur yfir sem einskonar málamiðlun vegna þessara laga.  Það var talað um að fara í mál við Bretana í október en ekkert varð af því.  Það voru líklega mikil mistök.  Síðan rekur hvert klúðrið annað en allt er þetta framkvæmt af lýðræðislegum kosnum stjórnum.   Þegar hér er komið sögu og Svavar er búinn að semja við Breta og Hollendinga eru við algjörlega komnir úti í horn.  Annað hvort samþykkjum við það sem við höfum sagt og stöndum við okkar orð eða hlaupumst undan og tæknilega lýsum yfir gjaldþroti.  Þessi kúgun sem þú talar um varð að raunveruleika á síðasta ári og það þýðir lítið að breyta stöðunni núna.  Við erum þar sem við erum og verðum að gera það besta sem við getum.  Aðalatriðið er að vinna með alþjóðasamfélaginu svo við getum hafið hér upp endurreisn og endurfjármagnað okkar skuldir svo allt lendi ekki í höndunum á útlendingum.  Að hafna Icesave er eins og að pissa í skóinn, smá léttir í byrjun en síðan byrja hörmungarnar.  Þetta er því miður ekki eins einfalt og það sýnist.  

Mistökin eru hjá Geri Haarde.  Hans stjórn átti að koma fram á hreinskilningslegan hátt og viðurkenna okkar stöðu sem fórnarlömb glæpamanna og reyna að komast út úr þessu í samvinnu með okkar nágrönnum en ekki að beita einhverjum hártogunum og barbabrellum í anda útrásarvíkinganna sem settu þjóðina í gjaldþrot.

Við vorum fórnarlömb glæpamanna en í stað þess að viðurkenna það snerust stjórnmálamenn á sveif með þeim og fórnuðu þjóðinni.  Þetta er hinn raunverulegi vandi og því miður er Icesave notað til að þyrla upp ryki og hylja slóð hinna seku. Öll þjóðin er í æsing út í útlendinga á meðan hinir seku koma sér undan.  Þetta er eins og í bíómynd.