Leiðtoginn Eva Joly

Eva fyllir hið mikla leiðtogatómarúm á Íslandi.  Enginn íslenskur stjórnmálamaður kemst með tærnar þar sem Eva er með hælana.  Í augum þjóðarinnar eru allir Alþingismenn þunnur þrettándi hjá Evu.  Hvers vegna?  Eigum við engan leiðtoga sem hafa kjark og þor?  Eða erum við að uppskera eins og við sáðum í hverju prófkjöri eftir öðru þar sem meðalmennskan og lágkúran var við völd.

Það þarf konu eins og Evu til að halda spegli upp að þjóðinni og sýna henni svart á hvítu hversu skelfileg mistök kjósendur hafa gert, trekk í trekk í vali sínu á stjórnmálamönnum.

Eva kennir okkur hvernig stjórnmálaleiðtogar eiga að tala sínu máli.  Hún felur sig ekki á bak við embættismenn og prótókoll heldur kemur beint fram og talar á skýran og skilmerkilegan hátt.   En hún er aðeins að gera það sem íslenskir stjórnmálamenn hefðu átt að gera strax í október og síðan í hverjum mánuði eftir það.   

Þjóðin kallar á sterkan og öflugan leiðtoga sem ekki aðeins getur náð til kjósenda heldur einnig talað málstað landsins erlendis á yfirvegaðan og hrokalausan hátt.

En er lausnin að kasta íslenskum valdsmönnum á Sorpu og fara að dansa í kringum Evu?  Freistandi og skiljanlegt en ekki framtíðarlausn.  Það er hættulegt að gera sér of miklar væntingar til einnar persónu sérstakleg þegar sú persóna er hér aðeins um stundarsakir. 

Eva er ekki sá leiðtogi en leitin verður að hefjast nú. Eitt er víst, sá einstaklingur finnst ekki á Alþingi.

 

Athugasemdir

[Hákon Jóhannesson (IP-tala skráð) 2.8.2009 kl. 10:01]

Mjög sérstök og áhugaverð nálgun hjá þér á erfiðu viðfangsefni.

[Halldóra Halldórsdóttir, 2.8.2009 kl. 10:59]

Tek undir vöntun á leiðtoga/um. Eva Joly er kærkominn gestur en engin framtíðarlausn. En er þetta tíminn til að efast um hæfni þeirra leiðtoga sem þjóðin kaus sér fyrir stuttu. Stjórnarandstaðan gerir allt til að draga þjóðarvagninn út af veginum - nú er tíminn til að sýna ábyrgð í stað þess að koma af stað moldviðri til að leiða huga landsmanna frá því hver ábyrgð þeirra flokka var í þessum málum. Nú er hætta á að alvarleg kaós brjótist út í þjóðfélaginu  - hvar ætla menn að standa.

[Andri Geir Arinbjarnarson, 2.8.2009 kl. 11:23]

Halldóra,

Ég er alveg sammála þér að þetta er ekki tíminn fyrir annað moldviðri en við verðum að fara að hugsa fram í tímann. Ef við ætlu að finna leiðtoga fyrir næstu kosningar verður sú leit að hefjast nú.

Ég var ekki hrifinn að Steingrími fyrir kosningar eins og bloggið hjá mér sýnir en verð að segja að hann hefur staðið sig vel miðað við aðstæður og ég get ekki séð að aðrir flokkar hafi betra fólk í augnablikinu.  Vandamálið er að bæði VG og D eru klofnir flokkar.

Best væri að Sjálfstæðisflokkurinn klofnaði í tvennt, hægri arm leiddan af Davíð og hans mönnum og ESB aðildar arm leiddan af ???  Vinstri Grænir eru líka klofnir.  Lilja Mósesdóttir fer fyrir vinstri armi sem er á móti Icesave og ESB og Steingrímur fer fyrir ESB hlutanum.  Síðan væri hægt að ná breiðri samstöðu allra "ESB" flokka og skilja Davíð og Lilju eftir á sitt hvorum vængnum.  Eins konar þjóðstjórn ESB sinna.

[Nína Margrét Grímsdóttir (IP-tala skráð) 2.8.2009 kl. 11:39]

Eins og talað út úr mínum huga, takk Andri!

[Friðrik Hansen Guðmundsson, 2.8.2009 kl. 12:27]

Annar hægri flokkur segir þú Andri.

Nú þegar undirbúin er umsókn okkar inn í ESB þá vaknar þessi spurning enn á ný. Afdrif þeirrar umsóknar ráðast í næstu kosningum.

Fyrst verður kosið um samninginn í þjóðaratkvæðagreiðslu og síðan þarf að vera meirihluti á Alþingi eftir næstu Alþingiskosningar til að samþykkja stjórnarskrábreytinguna.

Ef þannig fer að það verður ekki meirihluti á Alþingi fyrir ESB eftir næstu kosningar þá getur þingið ákveðið að ganga þar ekki inn, sagt að aðstæður séu breyttar o.s.frv. Þess vegna er mikilvægt að tryggja að það verði meirihluti fyrir ESB á Alþingi efir næstu kosningar til að tryggja málinu framgöngu og klára það.

Með 95% af  forystumönnum Sjálfstæðisflokksins á móti ESB og ef hann fengi 40% fylgi í næstu kosningum þá held ég að þetta ESB mál sé úr sögunni. ESB fer ekki í gengum þingið ef öll atkvæði hægrimanna á Íslandi, hvort sem þeir styðja ESB eða ekki, fara til Sjálfstæðisflokksins. Eins og stefna flokksins er í dag þá óttast ég að flokkurinn muni ekki staðfesta nauðsynlegar breytingar á stjórnarskrá þannig að hægt sé að ganga inn í ESB, þó þjóðin hafi samþykkt slíkt í þjóðaratkvæðagreiðslu.

Til að tryggja það að ESB málið farið í gegn þá þarf annan flokk á hægri vængnum sem hægrimenn sem vilja inn í ESB geta kosið. Aðeins þannig er hægt að tryggja meirihluta á þingi fyrir ESB eftir næstu Alþingiskosningar.

[Halldóra Halldórsdóttir, 2.8.2009 kl. 15:05]

Ég á ekki lýsingarorð yfir hversu þreytt ég er orðin á þessu flokkakerfi hér. Vonaði að það yrðu verulegar breytingar fyrir síðustu kosningar en svo varð ekki. Það er ekki vottur um styrk að þora ekki að skipta um um skoðun - heldur er það vottur um þroska. Heimurinn breytist og mennirnir með - sumir alla vega. En það eru líka ríkir hagsmunir sem halda fólki við óbreytt ástand.

[Halldóra Halldórsdóttir, 2.8.2009 kl. 15:06]

Ætlaði auðvitað að segja: heldur er það vottur um þroska að geta skipt um skoðun.

[Kama Sutra, 2.8.2009 kl. 16:25]

Loksins kom einhver fram á sjónarsviðið sem þorir að taka málstað okkar Klakverja á alþjóðavettvangi.  Kærar þakkir, Eva Joly!

Flestir íslenskir pólitíkusar, með fáeinum undantekningum, eru gungur og druslur - svo ég noti orðalag eins þeirra...

En ég skelfist samt tilhugsunina um einhvern einn sterkan leiðtoga fyrir þjóðina - sem kannski engin leið verður svo að losna við aftur, jafnvel í einhverja áratugi.  Var ekki Doddsson þannig "leiðtogi"?  Við vitum öll hvert það leiddi þjóðina.  Er hann ekki ennþá að stjórna Sjálfstæðisflokknum úr aftursætinu?

[Andri Geir Arinbjarnarson, 2.8.2009 kl. 18:15]

Kama Sutra,

Ég held að allir geti verið sammála um að það er mikill munur á Evu og Davíð.  Þegar ég tala um sterkan leiðtoga er ég að vísa til einstaklinga með hæfileika Evu, nútímaleiðtoga með reynslu og hæfni en ekki einhverra "einræðisherra".

Leiðtogastíll Davíðs eins og hjá Bush og Berlusconi byggist á einfeldni, áróðri og einstrengshætti sem alltaf endar með ósköpum. 

Það eru fáar þjóðir sem eiga Mandela og kannski fáum við ekki góðan leiðtoga í áratugi eða aldir.   En við verðum að leita ef ekki okkar vegna þá í þágu næstu kynslóðar.  Við megum ekki alltaf falla í þá gryfju að gefa okkur niðurstöðurnar fyrirfram og þar með viðhalda gömlum valdastrúktúr.

[Elle_, 2.8.2009 kl. 18:18]

Andri, já Eva Joly ver okkur úti í heimi.  Það þurfti talsmann fyrir landið.

Og tek undir með Halldóru um flokkakerfið.  

Hrannar, aðstoðarmaður Jóhönnu Sig. skammast út af Joly:
http://www.mbl.is/mm/frettir/innlent/2009/08/02/hrannar_sendir_joly_toninn/

[Elle_, 2.8.2009 kl. 18:20]

Og er sammála þér Andri hvað varðar leiðtoga-hæfileika Joly.

[Kama Sutra, 2.8.2009 kl. 18:44]

Andri,

Hefur þér aldrei dottið í hug að fara í pólitík?  Mér hefur fundist þú vera skynsamur og laus við öfga í þínum skrifum.  Ég hugsa að ég myndi kjósa þig.  Kannski ert þú jafnvel nýja leiðtogaefnið okkar?  Ég er ekki að djóka.

[Gunnar Skúli Ármannsson, 2.8.2009 kl. 22:37]

Áður en við förum að leita að nýjum leiðtoga er ágætt að hlusta á hvað Eva hefur að segja.

[Arinbjörn Kúld, 4.8.2009 kl. 08:33]

Sammála. Við þurfum í það minnsta eitthvert sameiningarafl, ég er þó efins um einhvern einn leiðtoga af gefnu tilefni.

Kveðja að norðan.