Hinrik VIII og Icesave

Í dag 24. júní 2009, eru 500 ár liðin síðan Hinrik VIII var krýndur Englandskonungur í Westminster Abbey. 

Hinrik var einn merkasti konungur Englands.  Hann stofnaði Ensku Biskupakirkjuna og sleit tengslin við Róm.  Hinrik gerði England að frjálsu og sjálfstæðu ríki og lagði grunninn að því heimsveldi sem Bretland síðar varð.  Auðvita var Hinrik barna síns tíma og auðvelt er fyrir okkur að gagnrýna hann út frá 21. aldar gildum en þá erum við að fara á skjön við söguna.

Án Hinriks er ekki víst að mótmælendur hefðu fengið jafn öflugan liðstyrk og tekist að koma á siðaskiptum í norður Evrópu jafn fljótt og afgerandi og raun varð á.

Hinrik var á síns tíma mælikvarða vel menntaður og víðsýnn.  Hann hlaut leiðsagnar Erasmus, eins þekktasta guðfræðings og heimspekings Hollendinga.  Þá mun amma Hinriks, Lady Margaret Beaufort hafa haft mikil áhrif á barnabarn sitt enda ein fremsta menntakona síns tíma og í raun langt á unda sinni samtíð.  Lady Beufort var einn helsti hvatamaður og velunnari skólamála á Englandi og á mikinn þátt í því að gera Cambridge University að einum helsta háskóla Evrópu, stöðu sem hann hefur haldið í yfir 500 ár.

Það má segja að andi Hinriks VIII svífi yfir Iceave samningnum.  Án Hinriks er ekki víst að Bretland hefði orðið það heimsveldi sem það varð eða Holland orðið það verslunarveldi sem það varð ásamt Bretlandi.  Því er ekki víst að Landsbankinn  hefði seilst eftir auði þegna þessara landa 500 árum seinna?  Og hvað ef siðaskipti hefðu aldrei orðið á Íslandi, hver væri staða okkar þá?

Eitt er víst, að ef Hinrik VIII væri uppi í dag væri hann ánægður með Icesave samninginn fyrir hönd Englands.

Athugasemdir

[Friðrik Hansen Guðmundsson, 24.6.2009 kl. 11:31]

Ég held að hver einast Breti geti leyft sér að brosa út að eyrum yfir þessum Icesave samningi.

[Halldór Jónsson, 26.6.2009 kl. 22:48]

Hinrik 8. byrjaði á flotavæðingunni sem gerði Englendinga að böðlum heimsins. Eitt stríðsskipið hans er til sýnis í Portsmouth við hliðina á Victory Nelsons. Stórkostlegt að sjá það allt og skynja mikilleikan og seigluna. Það þurfti að byrja meira en 160 árum áður en Victory var smíðað að rækta þau 3000 eikartré sem þurfti til smíðinnar . Svo þurfti mörg ár til að smíða. Victory var nærri fimmtug þegar hún fór í slaginn við Trafalgar. Og sigldi í önnur fimmtíu ár eftir það.

Svona áætlunarbúskapur er ekki framkvæmanlegur nema í konungsríki undir öruggu ættarveldi. Ekkert pláss fyrir upplausn Borgaraflokka alþýðu eða Samfylkingarfrekjur þar. Þessvegan er allt til andskotans hjá okkur með reglubundnu millibili. Við eignumst aldrei neinn Hinrik. 

 Elísabet dóttir hans bætti um betur. Uppgangur heimsveldisins var ævintýralegur. Maður hefur í raun alltaf dáðs að Bretum fyrir afrek þeirra til góðs og ills. Það er einhver kraftur í þeim og húmor sem fer vel í mann. Sauðskapur og aulaháttur en einnig hugrekki og þor. Kannske þær eigindir sem blunda í öllum mönnum en nást aldrei fram vegna ytri aðstæðna.

Við Íslendingar þurfum núna  ljónsöskrið eins og Churchill gaf Bretum á þeirra fínustu stund. Það kemur seint  frá refinum  Rauðgrana né  Grísnum. Við getum aldrei sameinast um nokkurn skapaðan hlut. Við erum ekki þjóð heldur þrýstihópar. 

En Martin Luther sagði: We shall overcome !

Hét hann ekki Valdimar Atterdag sem varð kóngur þegar mest á reið hjá dönskum ? Það hlýtur einhverntíman að verða dagur aftur. En fúl er næturvakan og biðin eftir birtunni.

[Elle_, 29.6.2009 kl. 18:57]

Manni verður óglatt af þessu Ice-save máli öllu.  Þeir sem leyfðu Icesave og ráku Icesave, og án vitundar okkar hinna, geta borgað með góðu eða illu.