Halli upp á milljón á mann!

Halli ríkis og sveitarfélaga er líklega kominn yfir 1,000,000 kr á hvert mannsbarn á Íslandi.  Á sama tíma hafa útflutningstekjur landsins fallið um 25% mælt á föstu gengi.  Svona getur dæmið aldrei gengið upp nema með hrikalegum aðgerðum sem munu umturna íslensku samfélagi.  Ríkisstjórnin getur boðið upp á fátt nema fátækt, niðurskurð, stöðnun og skattahækkanir! 

Nú er ekki hægt að slá lán erlendis til að redda málum og slá skjaldborg um heimilin og velferðarkerfið.  Án fjármagns eykst ekki hagvöxtur, án fjármagns verða atvinnuleysisbætur ekki borgaðar út, án fjármagns verða hjólum atvinnulífsins ekki komið af stað.  Og einmitt fjármagn er það sem ekki er til á Íslandi í dag, aðeins skuldir. 

Í raun er staðan orðin svo alvarleg að fátt er til "bjargar" nema að breyta erlendum lánum yfir í krónulán,  kippa verðtryggingunni úr sambandi og láta óðaverðbólgu éta upp skuldir samfélagsins.  Þetta tæki um 2 ár og yrði sársaukafullt.  Tímabundið myndu lífskjör verða þau lægstu í Evrópu á meðan krónan tæki dýfu niður undir 500 kr evran eða jafnvel niður að 1000 kr evran. 

Þetta er eina raunhæfa leiðin til að losna við skuldafenið á nokkurn vegin viðurkenndan veg.  Til lengri tíma yrði þetta líka langódýrast fyrir næstu kynslóð þar sem vandanum er ekki velt á undan sér heldur tekur sú  kynslóð sem kom þjóðinni í þennan vanda skellinn sjálf. 

Upp mun svo rísa nýtt þjóðfélag þar sem skuldir og verðbólga verða álitnir hinu mestu vágestir sem varast ber af öllum mætti.  Þetta verður okkar "Weimar" reynsla.

Þyngri róður en áætlað var

Athugasemdir

[Ólafur Eiríksson, 2.6.2009 kl. 23:41]

Sammála þér og það er ekki eftir neinu að bíða með þetta. Það næst aldrei samstaða um að afskrifa skuldirnar úr kerfinu og gjaldþrotaleiðin verður enn verri.

Þetta er bara staðan. Ég veit reyndar ekki hvað það tekur langan tíma fyrir stjórnvöld að uppgötva það.

[Arinbjörn Kúld, 2.6.2009 kl. 23:47]

Úff! Ljótt er það maður. Þetta mun líklega gerast sjálfkrafa þannig að........

[Ólafur Eiríksson, 2.6.2009 kl. 23:48]

Ég ætlaði að skrifa svipaða færslu en þakka þér kærlega fyrir að taka af mér ómakið. Þú gerðir það líka mun skýrar og betur en ég. Punkturinn er að það sem verið er gera hér virkar ekki og getur ekki virkað. Krónan næst aldrei upp aftur í þær hæðir sem vonast er eftir. Fyrst þarf hagkerfið að ná jafnvægi og það er langt í það.

[Friðrik Hansen Guðmundsson, 3.6.2009 kl. 01:19]

Þetta er ein leið Andri og kannski í dag það eina sem hægt er að gera.

Ég sé ekki hvernig við ætlum að borga 1.500 milljarða eða hvað þetta nú er sem menn telja að skuldirnar verða sem lenda á ríkissjóð. Þar fyrir utan eru svo skuldir sjávarútvegsins, 500 til 900 milljarðar og skuldir sveitarfélaganna. Við erum dottin ofaní algjört skuldafen hvert sem litið er.

Dugir það þó við veðsetjum tvær næstu kynslóðir?

Fyrst við erum enn með krónuna er þá ekki rétt að nýta sér þær leiðir og þau tækifæri sem það gefur okkur?