Aðildarviðræður verða að hefjast í sumar þegar Svíar fara með forsæti ESB

Ef ekki verður farið í ESB viðræður í sumar þegar Svíar fara með forsæti ESB missum við líklega af lestinni og þurfum að bíða í fleiri ár eftir viðræðum.

Þetta vita VG og því þurfa þeir aðeins að þrauka og skáka Samfylkingunni út í horn til áramóta.

Eftir það geta þeir samþykkt þjóðaratkvæði um viðræður fullvissir þess að ekkert verður úr þeim sama hvernig kosningin fer því ESB verður líklega ekki til viðræðu allt næsta kjörtímabil ef þær hefjast ekki 2009.

VG ekki tilbúinn í aðildarviðræður í sumar

Athugasemdir

[Anna Benkovic Mikaelsdóttir, 21.4.2009 kl. 00:15]

Sammála (VG)...skil ekki hvað þessi fíni maður er að fara?

[Valsól (IP-tala skráð) 21.4.2009 kl. 00:31]

Ef VG ætla að taka það frá þjóðinni að fá að ákveða hvort hún vill fara í EB eða ekki, þeir eru að gera stór mistök. Ég skora á alla sem vilja fara í ESB að kjósa Samfylkinguna, það er ekkert sem heitir annað en hreinn meirihluti. Þjóðin hefur ekki efni á því að fara eftir skussunum sem með ákvörðunum sínum eru að setja þjóðina í þá stöðu að geta orðið fyrir hruni nr. 2.

[Valsól (IP-tala skráð) 21.4.2009 kl. 00:56]

Við verðum að pósta þessum myndbandi sem hér er fyrir neðan.

Skoðið þetta myndband og sannfærist, þeir sem ekki eru vissir=> http://vimeo.com/4189836

[Haraldur Hansson, 21.4.2009 kl. 02:03]

Heldur þú í alvörunni að það skipti einhverju máli hver fer með forsæti? Heldur þú að Václav Klaus sé okkur óvinveittari ein einhver Svíi? Þetta hljómar eins og þú hafir hlustað á ruglið í Benedikt Jóhannessyni í Silfrinu. Hann hélt líka fram að við þyrftum að flýta okkur meðan Olli Rehn er stækkunarstjóri.

Hvorki lög né samningar sambandsins breytast eftir því hverra þjóðar kommissarinn er sem fer með tiltekin málaflokk. Ekki nema menn trúi þessu rugli í Benedikt og haldi að ESB stjórnist af geðþóttaákvörðunum embættismanna, en ekki lögum sambandsins.

Sé svo, þá er okkur hollast að vera langt, langt í burtu frá Brussel.

[Andri Geir Arinbjarnarson, 21.4.2009 kl. 07:32]

Haraldur,

Já það skiptir máli hver fer með forsætið í ESB ekki vegna þess að aðrar þjóðir eru óvinveittar okkur heldur vegna forgangsröðunar.

Þjóðir fara með forsætið í aðeins 6 mánuði og komast sjaldan yfir þau málefni sem þau setja á oddinn.  Líkurnar á að aðildarviðræður við Ísland fái meiri forgang hjá Svíum en þjóðum utan Norðurlandanna er miklar.

ESB aðild snýst um að viðhalda lífskjörum hér og að standa vörð um velferðakerfið. 

Hvernig verður staðið vörð um lífskjör á Íslandi og þau bætt með því að standa fyrri utan ESB? Hvers vegna hefur ekkert land í Evrópu fundið þessa leið?

Hvað með 70% af lögum og reglugerðum ESB sem Alþingi hefur samþykkt möglunarlaust? Á ekki að snúa því við?  Hvað ef ESB segir upp EES samningnum, er það ekki óskalausn anti-ESB sinna?

[Haraldur Hansson, 21.4.2009 kl. 09:01]

Okkur gekk mjög vel að skapa góð lífskjör á Íslandi og byggja upp fyrirmyndar velferðarkerfi. Það er sorglegt hvernig nokkrar gráðugir brjálæðingar gátu lagt allt á hliðina á aðeins fimm árum.

En það má ekki láta eins og þetta sé bara búið spil. Hvers lags uppgjöf væri það eiginlega? Eða halda að hin mikla hjálp komi frá Brussel. Ísland kemst ekki út úr kreppunni nema fyrir eigin vélarafli og það er til staðar; bæði vélin og eldsneytið. Og hún mun komast aftur á fullan skrið.

Þó ESB gæti flýtt því að endurheimta trúverðugleikann um eitt misseri eða tvö, þá vegur það ekki þungt í heildarmyndinni þegar upp verður staðið. En gæti reynst dýrkeypt. Það fæst ekkert ókeypis í þessum heimi, eins og þú veist.

Við tökum nú við 70% af regluverki sem varða innri markað ESB, en margir málaflokkar eru utan EES samningsins. Með inngöngu fáum við allan pakkann á öllum sviðum. Það er mikill munur þar á. Við höfum ekki bara "samþykkt möglunarlaust" heldur komið að málum gegnum EFTA og sameiginlegu EES nefndina, auk þess sem lög þurfa að hljóta afgreiðslu Alþingis.

Þó ég sé á móti inngöngu Íslands í ESB er það ekki nein "óskalausn" að EES samningnum verði rift. Enda viljum við öll góð samskipti við Evrópu. En verði það gert, þá verður það bara gert. Það eru alltaf til nýjar leiðir, þegar einum dyrum er lokað þá opnast aðrar. Það væri helvíti aumt að láta hótanir um slíkt kúga okkur til að skríða til Brussel. Við höfum meira að segja reynt þetta áður, þegar Bretar lokuðu á fiskkaup frá Íslandi 1975 vegna landhelgisdeilunnar. Það var létt verk og fljótlegt að bregðast við því. 

Innan ESB fengjum við vissulega sæti í ráðherraráðinu, sem er plús. En með okkar 5 atkvæði á þinginu náum við ekki að "snúa því við", það eru draumórar. Mest vinna við lagasmíðar fer fram í vinnuhópum, sem árið 2004 voru taldir vera 3.094, bara á vegum Framkvæmdastjórnarinnar. Við þyrftum her manns í Brussel til að ganga í takt við þá stóru.

Hér höfum við allt sem þarf til að byggja upp. Miklu meira en margar aðrar þjóðir. Hvort sem litið er til auðlindanna, menntunarstigs, aldurssamsetningar þjóðarinnar eða stofnana og stoða samfélagsins. Sóknarfæri á mörkuðum sem henta Íslandi verða ekki mestir í Evrópu í framtíðinni, heldur getum við átt samskipti við allan heiminn. Einangrun innan ESB er bara ekki góður kostur.

[Friðrik Hansen Guðmundsson, 22.4.2009 kl. 00:15]

Þá ber einnig að nefna að Malta fer með sjávarútvegsmálin á sama tíma. Þeir fengu sitt sjálfstjórnarsvæði umhverfis Möltu og stýra þar fiskveiðum.

Markmið okkar á að vera að semja um slíkt sjálfstjórnarsvæði hér heima eins og margir hafa nefnt. Þá stjórnum við öll hér eins og áður.

Við munum aldrei fá vinveittari þjóðir til að semja við.

[Haraldur Hansson, 22.4.2009 kl. 09:19]

Friðrik, í Guðs bænum ekki bera sjávarútveg á Íslandi saman við Möltu. Ársaflinn á Möltu er ívið minni en á einum netabát úr Grindavík. 

Vissir þú að útflutningsverðmæti sjávarafurða, á hvern íbúa, er $32 á ári á Spáni, $13 í Frakklandi, $28 á Möltu og $14 í Bretlandi. Á Íslandi er það $3.641. Hér er sjávarútvegur 280 sinnum mikilvægari en í Frakklandi. Á Möltu er hann svo lítill að samanburður er út í bláinn.