Baldur og Eva

Mál Baldurs Guðlaugssonar ráðuneytisstjóra er allt hið undarlegasta.  Að mörgu leyti er það mjög einfalt, ráðuneytisstjóri í fjármálaráðuneytinu átti hlutabréf í Landsbankanum, fór á fund í London um stöðu bankanna og seldi bréfin þegar hann kom heim rúmri viku áður en bankinn fellur.

Í okkar nágrannalöndum hefði ekki tekið yfir eitt ár að rannsaka svona mál og komast að niðurstöðu.  Yfirgnæfandi líkur eru á að erlendis hefði þetta verið hrein innherjaviðskipti. 

Í fyrsta lagi á ráðuneytisstjóri í fjármálaráðuneytinu ekki að eiga hlutabréf í bönkum og ef svo ólíklega vill til að hann hafi átt bréfin áður en hann tekur við stöðunni á hann annað hvort að selja þau strax eða láta þau í umsjón þriðja aðila.  Undir engum kringumstæðum á ráðuneytisstjóri að geta selt hlutabréf á nokkrum tíma hvað þá viðkvæmum tíma nema með skriflegu leyfi ráðherra og siðanefndar.

Mér finnst langlíklegast að Eva Joly hafi komist í þetta mál og séð strax að hér var um jarðsprengju að ræða sem gæti skaðað hennar orðstír og sett hennar rannsókn í uppnám.  Í augum útlendinga virðist mál Baldurs mjög einfalt og augljóst.  Ef svona mál fer ekki fyrir saksóknara, hvaða von er að flóknari mál komist inn á hans borð?

Hins vegar, ef Evu tekst að fá Baldur kærðan fyrir innherjaviðskipti stendur hún með pálmann í höndunum og hefur tekist að koma höggi á efsta lag íslenskra valdaelítu sem hingað til hefur verið ósnertanleg.  Eftirleikurinn verður þá auðveldari.

 

Athugasemdir

[Lissy (IP-tala skráð) 22.10.2009 kl. 08:29]

Go Eva!!!

[Kama Sutra, 22.10.2009 kl. 10:15]

Á ég að þora að segja:  Þetta fer að verða spennandi?

Bestu glæpareyfarar eru farnir að blikna í samanburði við það sem kann að gerast í sakamálum hérna á næstunni.

[Andri Geir Arinbjarnarson, 22.10.2009 kl. 10:29]

Kama,

Það er rétt og efniviðurinn í bækur næstu árin er óendanlegur.  

[Björn Birgisson, 22.10.2009 kl. 11:21]

Hvernig gat Fjármálaeftirlitið komist að þeirri niðurstöðu að ekki væri ástæða til að aðhafast neitt í máli Baldurs?